1Th 2 | KQC | STEP | Usika ourena, ya kaya diba una bae nesi ya oto reyafa bi tavoitavoi de reyafa.

a 2.2:Acts 16.19–24, 17.1–9

c 2.14:Acts 17.5

d 2.15:Acts 9.23, 29, 13.45, 50, 14.2, 5, 19, 17.5, 13, 18.12

1 Thessalonians 2

Paul di moimai Thessalonica ri

1 Usika ourena, ya kaya diba una bae nesi ya oto reyafa bi tavoitavoi de reyafa. 2 Ya ya diba, sena Philippi ri bi una rofu no reyadi ma esikaesika moiyafa, idu uni Sei di ini aedena yaku yeiva una maro dada ini ago buni bi ya niyafa, una tourage regamadi utari. ^a 3 Uni usausa ago ya vene rofu resifa bi vegu no o mokena no dudu de ya eru regika ofaofa dudu. 4 Idu Sei di ura ini ago buni uni vanari aigi reyo kana, mina nisifa; amiye di uka moi buni regika de resifa, idu Sei di uka moi ada regika resifa, kaere bi uni uka mokena diba nisi vedo. 5 Ya ya diba una bi ya moi ada reyaganedi di ago dudu de bae neyafa, o unaike auna kana irisifa ni ofa regika ago nina de reyafa — Sei diba uni uka mokena bi! 6 Amiye yaku uni roka moi odoro reyaganedi de reyafa, ya vene rofu o be vene yaku ka de, 7 idu Keriso di ini ni feidena vene kana una yaku uni vava dudu uni aedegi ya efare reyagadu. Idu ya vene fogori ave niyafa, kosini yaku ini midamida susu masi dogo redo kana ^{▼▼2.7ya vene fogori ave niyafa, kosini...kana;bura bedakaiya sa amegamafa ri, una bi midamida kana; una bi kosini kananufa.}. 8 Uni uka toragade iniye ya marafa, mina resi ada dudu Sei di ago buni maka de ya marafa idu uni vegu ka. 9 Usika ourena, rama iniye mokefa, Sei di ago buni ya vene rofu ni digasa urusa ariu moimai reyafa, moimai gira resi esika moiyafa, ya vene rofu toe moi baina ga regika.

10 Ya vene ma Sei iniye ka una vegamadi, uni vegu gokai bi akeke, rorobo ma vegu no de ya vene kaere uka vari gira maradi vene di fogori. 11 Adina ya ya diba una ya neinei gokai reyafa bi baba yaku ini mida redo kana, 12 Sei di ukari ina rofu yi vegu buni niyainedi ya egira regamafa, kaere bi ya raka nido ini ourefeidena amedo sana ma ini vabara ideri dui reyagane.

13 Ma una ka toga Sei rofu buni toragade masifa, adina Sei di ago buni moiyadi, goina bi una rofu neideyadi ri; ya bi amiye di ini ago kana dudu de moiyadi, idu Sei di ago kana, goina bi rama iniye. Adina Sei yaku mina ago dudu ka ini moimai yi veguri redo, ya kaere ina rofu uka vari gira aidedi. 14 Ma ya uni usika ourena kaere bi Iesu Keriso di, beika Sei di dubu ri Judea gaganiri amededi Jew vene gutu ina vene rofu reyadi kana, yi gagani vene gutu esikaesika ka moiyadi, ^c 15 kaere yaku Warika Amiye Iesu ma Sei di ago nidedi vene umuyeyadi ma una ka meki reyadi. Ina bi Sei moi ada de reyadi, idu amiye tau di tuma niyadi! ^d 16 Tutubena dava bouna vene rofu sina ni marafa moi vegu rigedi, idu uni mina ka biri regi regamadi. Mina ida dudu ini vegu no mina besabesa tauri bodedi. Sei di ini gubuyo tora iniye bi kamini ina fafau deyo!

Paul dubusa ina vene vegi mokemoke reyo

17 Idu, usika ourena, neituari ya rofu etagae reyafa ri — uni mokemoke bi de, idu uni rovaita yaku maka — gokai de ya veyafa ma gokai dubusa ya vegika reyafa! 18 Adina uni ura bi dubusa ya rofu bae negifa. Na Paul, bi besa bae negika reida, idu Satani yaku una biri riyo. 19 Adina uni Warika Amiye Iesu di ini budari ini dairi dego ri, bi ya vene bi kaere bi uni uka mokena, una ada ma uni moimai rei mona reyafa di vegu. 20 Rama iniye, ya vene bi uni matuka ma ada!